पोलीस वारंट न्यूज नेटवर्क-२१ जुलै
जामखेड तालुक्यातील खर्डा येथे दिनांक १२ जुलै रोजी ग्रामपंचायतने ग्रामसभा आयोजित केली होती,त्यावेळी खर्ड्यातील युवकांनी आक्रमक भूमिका घेत खर्डा ग्रामपंचायतचे विभाजन करण्याचा ग्रामसभेत ठराव घेण्याची भूमिका मांडली होती,त्यावेळी तेथे उपस्थित असलेल्या १४ ग्रामपंचायत सदस्यांनी उभे राहून माइक द्वारे ग्रामस्थां समक्ष या ठरावाला पाठिंबा व्यक्त केला होता त्यानंतर दिनांक २१ जुलै रोजी ग्रामपंचायतची मासिक बैठक ग्रामपंचायतमध्ये झाली यामध्ये काही ग्रामपंचायत सदस्यांनी ग्रामपंचायत विभाजनाला सध्या विरोध केला असल्याचे विरोधी ग्रामपंचायत सदस्यांनी ही माहिती ग्रामस्थांच्या कानावर घातली त्यामुळे खर्ड्यातील ५० युवकांनी एकत्र येत
ग्रामपंचायत कार्यालयात तातडीने जाऊन चौकशी केली असता ग्रामसभेत घेतलेल्या ग्रामपंचायत विभाजनाला सत्ताधारी आठ ग्रामपंचायत सदस्यांनी विरोध केल्याचे त्यांना सांगण्यात आले. ग्रामपंचायत सदस्यांनी ग्रामपंचायत विभाजना संदर्भात भूमिका का बदलली अशी संतप्त भावना व्यक्त केली,याबाबत त्यांनी ग्रामविकास अधिकारी यांच्याबरोबर चर्चा केली.परंतु गावाच्या विरोधात भूमिका घेतल्याचे कारण सांगत काही संतप्त युवकांनी ग्रामपंचायत कार्यालयास कुलूप ठोकले आहे. तसेच ग्रामपंचायत कडून खर्डा शहरात होणारा पाणीपुरवठा हा दूषित असून स्वच्छ पाणी आल्याशिवाय पाणी सोडू नये अशा प्रकारचे निवेदन त्यांनी दिले.
यावेळी ग्रामपंचायत कार्यालयासमोर मोठा गोंधळ उडाला होता.वास्तविक पाहता जामखेड तालुक्यातील सर्वात मोठी ग्रुप ग्रामपंचायत म्हणून खर्डा ग्रामपंचायत कडे पाहिले जाते, या ग्रामपंचायत मध्ये दरडवाडी, पांढरेवाडी,गीतेवाडी, नागोबाचीवाडी, मुंगेवाडी या गावांचा समावेश असल्याने खर्डा ग्रामपंचायतची सदस्य संख्याही १७ सदस्यांची आहे, त्यामुळे ग्रामसभेत खर्ड्यातील युवकांनी खर्डा शहराची वेगळी ग्रामपंचायत व्हावी असा ठराव सर्वानुमते घेतला, परंतु काही सत्ताधारी ग्रामपंचायत सदस्यांनी २१जुलै शुक्रवारी रोजी ग्रामपंचायतच्या मासिक बैठकीत सध्या विरोध केल्याने संतप्त युवकांनी खर्डा ग्रामपंचायतला कुलूप ठोकले आहे,त्यामुळे खर्डा ग्रामपंचायत व गावातील तरुणांमधील पुढील संघर्ष उफाळण्याची शक्यता निर्माण झाली आहे.
कोणत्याही टिप्पण्‍या नाहीत:
टिप्पणी पोस्ट करा