मिरजगाव पोलिसांकडून ४१ जनावरांची सुटका, २१ लाखांचा मुद्देमाल जप्त

पोलीस वारंट न्यूज नेटवर्क/१७ एप्रिल

कर्जत तालुक्यातील मिरजगाव पोलिसांनी धडाकेबाज कारवाई करत कत्तलीकरिता घेऊन जाणाऱ्या 41 जनावरांची सुटका केली. त्याच वेळी 8 टन वजनाचे गोमांस घेऊन जाणारा आयशर टेम्पोसह 21 लाखांचा मुद्देमाल जप्त केला.

मंगळवारी मध्यरात्री निंबोडी शिवार येथून एका आयशर टेम्पोमधून गोमांस व एका पिकअपमधून गोवंश जनावरे व वासरे कत्तलीसाठी नेण्यात येणार असल्याची माहिती मिरजगावचे सहायक पोलीस निरीक्षक प्रकाश पाटील यांना मिळाली होती. त्यानंतर सहायक पोलीस निरीक्षक पाटील यांनी पथकासह निंबोडी शिवारातील एका शेतात जाऊन छापा टाकला.

इम्रान बाबा शेख, (वय 32, रा. बार्शी नाका, ख्वाजानगर, बीड), जमीर बशीर पठाण, (वय 54), योगेश रवींद्रसिंग परदेशी, (वय 45, रा. खडकपुरा गल्ली, करमाळा), मुसविर अजिज कुरेशी (वय 31), अल्फेश समीर कुरेशी (वय 17, दोघे रा. खडकत, ता. आष्टी, जि. बीड) हे घटनास्थळी आढळून आले. पोलिसांनी सर्वांना ताब्यात घेऊन चौकशी केली. सर्वांवर गुन्हा दाखल करण्यात आला आहे.

घटनास्थळी गोमांसने भरलेला टेम्पो मिळून आला. तसेच या कामासाठी ते वापरत असलेल्या पाच मोटारसायकली व एक स्विफ्ट कार पोलिसांनी जप्त केली. घटनास्थळापासून काही अंतरावर एक पिकअप वाहनामध्ये कत्तलीसाठी आणलेली एकूण 38 गोवंश जातीची वासरे आढळली. जवळच कत्तलीसाठी आणलेल्या एकूण 8 गायी मिळून आल्या आहेत. यावेळी ताब्यात घेतलेल्या आरोपींसोबत असणाऱ्या इतर साथीदारांचा शोध सुरू आहे. मिरजगाव पोलीस स्टेशनचे प्रभारी सहायक पोलीस निरीक्षक प्रकाश पाटील, सतीश भताने, बबन दहिफळे, दीपक पवार, सुनील खैरे, गोकुळ पळसे, राजेंद्र गाडे यांच्या पथकाने ही कारवाई केली. गुह्याचा तपास पोलीस हेड कॉन्स्टेबल बबन दहिफळे करीत आहेत.