जामखेड प्रतिनिधी : १७ नोव्हेंबर
जामखेड तालुक्यात ८९४ जनावरांना लंपीची बाधा, २६ जनावरांचा मृत्यू झाला आहे. जामखेड पंचायत समिती प्रशासन लंपीबाबत पूर्ण काळजी घेत आहे. गावागावात कीटकनाशकांची फवारणी वरचेवर चालू आहे. "माझा गोठा, स्वच्छ गोठा" ही मोहीम प्रशासनाच्या वतीने राबविण्यात येत आहे. आपल्या गोठ्याची दैनंदिन स्वच्छता ठेवावी. डासांपासून जनावरांचे रक्षण करावे. तस पशुपालकांनीही लंपी स्किन आजाराबाबत काळजी घ्यावी असे आवाहन जामखेड पंचायत समितीचे गटविकास अधिकारी प्रकाश पोळ यांनी केले आहे.
सद्या महाराष्ट्रात सर्वत्र लंपी स्किन आजाराने थैमान घातले असून पशुपालकांमध्ये चिंतेचे वातावरण आहे. मागील दोन-अडीच महिन्यांपासून जामखेड तालुक्यातही लंपीचा शिरकाव झाला आहे. जामखेड तालुक्यात गायवर्गीय ५८ हजार ८९१ जनावरे आहेत. दि. २ सप्टेंबर रोजी जामखेड तालुक्यातील मोहरी या गावात हरिदास गोपाळघरे यांच्या गायीला सर्वात आधी लंपीचा प्रादुर्भाव दिसून आला. त्यानंतर विविध गावात ही संख्या वाढत जाऊन आजवर बाधित पशूंची संख्या ८९४ वर पोहचली आहे. यापैकी ५२१ जनावरे बरे झाले असून ३४७ जनावरांवर उपचार सुरू आहेत तर २६ जनावरांचा या आजारामुळे मृत्यू झाला आहे. दि. १ ऑक्टोबर रोजी बोरले या गावातील आबासाहेब काकडे यांची गाय लंपीची पहिली शिकार ठरली होती. यानंतर आजवर तालुक्यातील २६ जनावरांचा लंपी स्किन या आजारामुळे मृत्यू झाला आहे. यापैकी २० जनावरांचा नुकसानभरपाई प्रस्ताव पाठवण्यात आला आहे.
चौकट...
अहमदनगर जिल्ह्याचा विचार करता कोपरगाव तालुक्यात सर्वात कमी रुग्ण व मृत्यू असून यानंतर जामखेड तालुक्याचा क्रमांक लागतो. आरणगाव, पाटोदा,खामगाव, भवरवाडी, हळगाव या कर्जत तालुक्याला लागून असलेल्या भागात तुलनेने लंपीचा जास्त प्रादुर्भाव दिसून येत आहे.
प्रतिक्रिया...
जामखेड तालुक्यातील १००% गायवर्गीय जनावरांचे लसीकरण पूर्ण झाले असून तुलनेने प्रादुर्भाव कमी आहे. तरीही पशुपालकांनी काळजी घ्यावी. घाबरून न जाता तात्काळ पंचायत समिती, पशुवैद्यकीय दवाखाना किंवा पशुसंवर्धन विभागाला संपर्क साधावा.
-डॉ. संजय राठोड,पशुधन विकास अधिकारी (विस्तार), पंचायत समिती जामखेड.
कोणत्याही टिप्पण्‍या नाहीत:
टिप्पणी पोस्ट करा