आजपासून मुक्काम पोस्ट सिद्धटेक

पोलीस वारंट न्यूज नेटवर्क/30मार्च

भारतीय डाक विभागाने कात टाकली असून ते अनेक नवनवीन योजना राबवित आहे. यामध्ये भर म्हणून अष्टविनायक गणपती मधील एक प्रसिद्ध असलेले सिद्धिविनायक गणपतीचे सिद्धटेक ता. कर्जत या ठिकाणी नुकतेच नवीन डाक कार्यालय चालू झाले आहे.

 यामुळे आता येथील ग्रामस्थांना सिद्धटेक नावाचे व आपल्या हक्काचे नवीन डाक कार्यालय मिळाले आहे. सिद्धटेक शाखा डाकघर  हे राशीन उपडाकघर अंतर्गत काम करेल तसेच सिद्धटेक या नवीन डाक कार्यालयाचा पिनकोड 414403 हा असणार आहे. यापूर्वी सिद्धटेक गावचा डाक विभागाचा व्यवहार जलालपूर 414403 या डाकघरा अंतर्गत चालायचा.

सिद्धटेक येथे मनी ऑर्डर, पोस्टाने पाठवायचे प्रसाद पाकिट व तिकीट विक्री याचा व्यवसाय अधिक प्रमाणात आहे.

सिद्धटेक येथे नवीन डाक कार्यालय झाल्यामुळे येथील ग्रामस्थांमध्ये आनंदाचे वातावरण आहे. नवीन डाक कार्यालयाचा उद्घाटन सोहळा नुकताच अहमदनगर विभागाचे वरिष्ठ डाक अधीक्षक बी. नंदा व कर्जत उपविभागाचे उपविभागीय डाक निरीक्षक अमित देशमुख यांच्या प्रमुख उपस्थितीमध्ये झाला.

यावेळी संतोष घागरे, कैलास भुजबळ,सुनील धस, अशोक मोकाशे, चंद्रकांत नेटके, गोविंद पवार, कार्तिकी खेडकर, सोनाली भारमल,संजयनाना राऊत,लक्ष्मण शेटे, सुरज तोरडमल आदी  उपस्थित होते.यावेळी सिद्धिविनायक ट्रस्ट सिद्धटेक, ग्रामपंचायत सिद्धटेक व ग्रामस्थांचे अनमोल सहकार्य लाभले. दर्शना लोटे यांनी सिद्धटेक येथील प्रथम शाखा डाकपाल म्हणून म्हणून तात्पुरता पदभार स्वीकारला.

सिद्धटेक परिसरातील ग्रामस्थांनी या नवीन डाक कार्यालय मार्फत मिळणाऱ्या सर्व डाक सेवांचा व योजनांचा लाभ घ्यावा असे आवाहन यावेळी उपविभागीय डाक निरीक्षक अमित देशमुख यांनी केले.

चौकट

भारत सरकारच्या डाक विभागा अंतर्गत विविध योजना व सेवा ग्रामस्थांसाठी आहेत. कार्यालयीन दिवशी दुपारी दोन वाजेपर्यंत विविध डाक सेवांचा लाभ  सर्व पात्र ग्राहकांना सिद्धटेक या नवीन डाकघरामध्ये घेता येतील.

बी नंदा 

वरिष्ठ डाक अधीक्षक अहमदनगर