आहिल्यानगर प्रतिनधी/२३एप्रिल२०२५
पुणे जिल्ह्यातील बारामती येथे महाराष्ट्र विधानपरिषदेचे सभापती राम शिंदे यांच्या दौऱ्यादरम्यान घडलेल्या घटनेने सुरक्षा तंत्रातील त्रुटींकडे लक्ष वेधले आहे. दिनांक 15 व 16 मार्च रोजी झालेल्या या दौऱ्यादरम्यान सुरक्षेच्या पातळीत गंभीर त्रुटी आढळल्याची बाब समोर आल्याने तीन प्रमुख पोलीस अधिकाऱ्यांची खातेनिहाय चौकशी करण्यात आली. पोलीस अधिकारी श्री. प्रवीण बाळासाहेब मोरे, श्री. रविंद्र कोळी आणि श्रीमती वैशाली पाटील यांचेकडून कर्तव्यात कसूर झाल्याचे स्पष्ट झाल्याने दोषी पोलीसांवर दोन हजार रुपयांची दंडात्मक कारवाई करण्यात आली.
नेमकं प्रकरण काय:
महाराष्ट्र विधानपरिषदेचे सभापती राम शिंदे (Ram Shinde) यांच्या 15 व 16 मार्च रोजीच्या बारामती दौऱ्यादरम्यान गंभीर स्वरुपाच्या सुरक्षा विषयक त्रुटींसंदर्भात चौकशीअंती कर्तव्यात कसूर केलेल्या पोलीस अधिकाऱ्यांवर कारवाई करण्यात आली आहे. दोषी पोलीसांना दोन हजार रुपये दंड बजावण्यात आला आहे. कोल्हापूर परिक्षेत्राचे विशेष पोलीस महानिरीक्षक यांनी यासंदर्भात पोलीस अधीक्षक, पुणे ग्रामीण यांना चौकशी करुन वस्तूनिष्ठ अहवाल सादर करण्याबाबत कळवले होते. त्यानुसार चौकशी करण्यात येऊन प्राप्त अहवालाचे अवलोकन केले असता विधानपरिषदेचे सभापती राम शिंदे यांच्या दिनांक 15 व 16 मार्च रोजीच्या बारामती, जिल्हा पुणे येथील दौऱ्या दरम्यान सुरक्षा व राजशिष्टाचार विषयक गंभीर त्रुटी आढळून आल्या होत्या. त्यामुळं 1) श्री.प्रवीण बाळासाहेब मोरे, पोलीस निरीक्षक जिल्हा विशेष शाखा, पुणे ग्रामीण 2) श्री.रविंद्र कोळी, राखीव पोलीस निरीक्षक, पोलीस मुख्यालय, पुणे ग्रामीण 3) श्रीमती वैशाली पाटील, पोलीस निरीक्षक, बारामती तालुका पोलीस ठाणे यांचेकडून कर्तव्यात कसूर झाल्याचे स्पष्ट झाले आहे. त्यामुळे त्यांच्यावर शिस्तभंगाची कारवाई करण्याबाबतचा अहवाल विशेष पोलीस महानिरीक्षक कोल्हापूर परिक्षेत्र, कोल्हापूर यांच्या कार्यालयास प्राप्त झाला. त्यानुसार कसूर केलेल्यांवर कारवाई करण्यात येत आहे. त्याचप्रमाणे 1) श्रीमती सुवर्णा गायकवाड, परिविक्षाधीन महिला पोलीस उपनिरीक्षक, बारामती तालुका पोलीस ठाणे 2) श्री.शामराव यशवंत गायकवाड, पोलीस हेड कॉन्स्टेबल, पोलीस मुख्यालय पुणे ग्रामीण 3) श्री.रोहित दिलीप वायकर, पोलीस शिपाई पोलीस मुख्यालय पुणे ग्रामीण 4) श्रीमती सारिका दादासाहेब बोरकर, पोलीस हेड कॉन्स्टेबल जिल्हा विशेष शाखा, पुणे ग्रामीण 5) श्री.वसंत सखाराम वाघोले, सहाय्यक फौजदार, पुणे ग्रामीण यांनी देखील कर्तव्यात कसूर केल्याचे निष्पन्न झाल्याने पोलीस अधीक्षक, पुणे ग्रामीण यांचेकडून त्यांना दंडनीय कारणे दाखवा नोटीस पाठवून खातेनिहाय चौकशीची कारवाई करण्यात येत आहे.
कोणत्याही टिप्पण्‍या नाहीत:
टिप्पणी पोस्ट करा