भीषण अपघातात भाजपचे माजी आमदार आर. टी. देशमुख यांचा जागीच मृत्यू

लातूर प्रतिनधी/२६ मे२०२५
औसा रोडवर बेलकुंडी गावाजवळ झालेल्या भीषण अपघातात भाजपचे माजी आमदार आर. टी. देशमुख यांचा जागीच मृत्यू झाला. हा अपघात आज दुपारी पाच वाजेच्या दरम्यान झाल्याची माहिती आहे.
प्राथमिक माहिती नुसार, माजी आमदार देशमुख हे औसाकडे चारचाकी गाडीतून येत होते. बेलकुंडीजवळ उड्डाणपुलाच्या जवळ चालकाचे नियंत्रण सुटल्यामुळे गाडी उलटली. या भीषण अपघातात देशमुख गंभीर जखमी झाले. त्यांना तात्काळ रुग्णालयात नेत असतानाच वाटेतच त्यांनी अखेरचा श्वास घेतला. अपघात एवढा भीषण होता की गाडीचा चेंदामेंदा झाला आहे.
आर. टी. देशमुख हे माजलगाव मतदारसंघाचे माजी आमदार आहेत. २०१४ मध्ये माजलगावामध्ये राष्ट्रवादीचे प्रकाश सोळंके यांचा देशमुख यांनी जवळपास ३७ हजार मताधिक्क्याने पराभव केला होता. त्यांनी सामाजिक व राजकीय क्षेत्रात मोठे योगदान दिले होते. त्यांच्या निधनाने एक अनुभवी व प्रगल्भ नेता हरपल्याची भावना व्यक्त होत आहे.