पोलीस वारंट न्युज नेटवर्क : ५ एप्रिल
पैठण-पंढरपूर या बहुप्रतीक्षित व बहुचर्चित पालखी मार्गावरील दिघोळ ते खर्डा दरम्यानचे रस्त्याचे काम गेल्या दोन वर्षापासून बंद अवस्थेत असल्यामुळे परिसरातील नागरिकांना याचा मोठा त्रास सहन करावा लागत असल्याने ही कामे त्वरित पूर्ण करावी अन्यथा नागरिक आंदोलन करण्याच्या पवित्र्यात असल्याचे दिसत आहे. .
जामखेड तालुक्यातील जातेगाव, दिघोळ, माळेवाडी, मोहरी, तेलंगशी, जायभायवाडी, धामणगाव, देवदैठण, नाहुली या गावांसह विविध ठिकाणांहून येणारे नागरिक व वाहनधारकांची मोठ्या संख्येने या मार्गावरून येजा चालू असते.
या भागातील शेतकरी हजारो लिटर दूध, तरकरी, शेतीमाल घेऊन खर्डा या ठिकाणी जातात. परंतु रस्ता खराब असल्यामुळे दुधासह शेतीमालाची नासाडी होते. दिघोळ, व जातेगाव वरून ये जा करणारे वाहनधारक व पदाचारी यांनाही या रस्त्याने जाणे नकोसे वाटते. दिंडीतील वारकरी तर रस्त्यावरून जाण्याऐवजी रस्ता व दिंडी सोडून डोंगराने आपली पायवाट करतात. त्यामुळे पहिलाच रस्ता बरा म्हणण्याची वेळ वाहन चालक व प्रवाश्यां वर आली आहे.
सन २०१५ ते २०१९ दरम्यान हे काम जलद गतिने सुरू होते. त्यानंतर या कामाची गती मंदावत गेली. हे काम कधी चालू तर कधी बंद अवस्थेत असते. गेल्या ३ वर्षापासून हे काम पूर्ण बंद अवस्थेत असल्यामुळे प्रवाशांवर नाहक त्रास सहन करण्याची वेळ आली. ना खासदार, ना आमदार, ना अधिकारी, ना ठेकेदार अश्या कोणालाच याचे देणे घेणे नसल्याचे कामाच्या दिरंगाईमुळे दिसून येते. त्यामुळे या भागातील नागरिक संताप व्यक्त करत आहेत. मध्यंतरी वन विभाग व काही शेतकऱ्यांनी रस्ता आडवा आडवीचे प्रकार केले होते. यावर तोडगा काढून संबंधित ठेकेदाराला पोलीस संरक्षणात रस्त्याचे काम सुरू करण्यास परवानगी दिली गेल्याचे कळते. परंतु ठेकेदाराचा अनुउत्साह दिसून आला.
दिघोळ ते खर्डा रस्त्यावरील सर्व पुलांचे कामे अपूर्ण अवस्थेत आहे. फुलावर मोठे खड्डे पडले आहेत. वाहन चालकांना अक्षरशा कसरत करावी लागते. अनेक वेळा वाहने खड्ड्यात पडण्याचे प्रकारही घडले आहेत. पावसाळ्यात तर रस्त्यावर वाहने घसरून पडतात. हा रस्ता खराब असल्यामुळे रस्त्यावर आडवा आडवीचे प्रकारही घडतात. अनेक वेळा अधिकारी, आमदार, खासदार, यांच्याकडे मागणी करूनही याकडे दुर्लक्ष केले. त्यामुळे आता हे काम लवकर सुरू न झाल्यास जातेगाव, दिघोळ, माळेवाडी, मोहरी, जायभायवाडी, तेलंगशी, या भागातील सरपंच उपसरपंच वाहन चालक, प्रवासी, व नागरिकांनी आंदोलनाचा इशारा दिला आहे.
गेल्या तीन-चार वर्षांपासूनपैठण पंढरपूर पालखी मार्गाचे काम अपूर्ण अवस्थेत असूनयाचा त्रास सर्वसामान्य नागरिकांना होतो. खराब रस्ता असल्यामुळे जर अपघात झाला तर या परिसरात आरोग्य केंद्र नसल्यामुळे या भागातील रुग्ण, गरोदर महिला यांना तात्काळ उपचारासाठी खर्डा किंवा जामखेड येथे पोहोचणे जरुरीचे असताना खराब रस्त्यामुळे पोहोचण्यास उशीर होत असल्यामुळे अनर्थ घडल्यास याला जबाबदार कोण? ठेकेदाराने पावसाळ्या पूर्वी काम सुरू करून पूर्ण करावे. अन्यथा तीव्र आंदोलन छेडले जाईल.
सौ. दिपाली पांडुरंग गर्जे
माजी सरपंच ग्रामपंचायत, जातेगाव
गेल्या चार-पाच वर्षांपूर्वी पासून पैठण ते पंढरपूर रस्त्याचे काम चालू आहे. वेळोवेळी निवेदन देऊन सुद्धा रस्त्याचे काम पूर्ण झाले नसल्यामुळे नागरिकांना खूप मोठा त्रास सहन करावा लागत आहे. पेशंट, विद्यार्थी, नागरिक ,महिला यांना धुळीचा त्रास होऊन आजारी पडण्याचे प्रमाण वाढले आहे .रस्त्याचे अपूर्ण कामामुळे अपघाताच्या प्रमाणात वाढ झाली आहे. तरी प्रशासनाने लवकरात लवकर संबंधित ठेकेदाराकडून काम चालू करून पूर्ण करून घ्यावे अन्यथा मोठे आंदोलन केले जाईल.
मच्छिंद्र गहीनाथ गिते
भाजपा गणप्रमुख, साकत गण
कोणत्याही टिप्पण्या नाहीत:
टिप्पणी पोस्ट करा