जामखेड प्रतिनधी/१४जुलै२०२५
जामखेड येथील नगरपरिषदेच्या निवडणुकीत महिलांच्या संधींना मोठा विस्तार देत, एकूण २४ नगरसेवक पदांपैकी १२ जागा महिला उमेदवारांसाठी राखीव करण्यात आल्या आहेत. याशिवाय, या निवडणुकीत अनुसूचित जमातींसाठी पहिल्यांदाच एक पद राखीव राखण्याचा निर्णय घेण्यात आला असून, तेही महिला उमेदवारांसाठी सोडतीद्वारे राखीव राहण्याची शक्यता आहे. या बदलाने सामाजिक समावेश आणि प्रतिनिधित्वाच्या दिशेने महत्त्वाचा टप्पा गाठला गेला आहे.
राज्य निवडणूक आयोगाच्या आदेशानुसार, जामखेड नगरपरिषदेच्या सदस्यसंख्या २४ असून त्यातील अर्ध्या जागा महिलांसाठी राखीव आहेत. अनुसूचित जातींसाठी एकूण ३ पदे राखीव ठेवण्यात आली आहेत, ज्यापैकी २ जागा महिलांसाठी आरक्षित आहेत. नागरिकांचा मागास प्रवर्ग (नामाप्र) ६ पदांसाठी राखीव असून त्यातील अर्ध्या जागा महिलांसाठी आरक्षित आहेत. याशिवाय, सर्वसाधारण प्रवर्गातील ७ जागांपैकी ४ किंवा ३ जागा महिलांसाठी राखीव राहतील, ज्याचा निर्णय अनुसूचित जमातीसाठी राखीव पदाच्या सोडतीनंतर निश्चित होईल.
जामखेड नगरपरिषदेच्या निवडणुकीच्या प्रभाग रचनेची प्रक्रिया सध्या सुरू असून, प्रारूप प्रभाग रचना २२ ते २८ ऑगस्ट दरम्यान हरकतींसह जाहीर केली जाईल. अंतिम प्रभाग रचना ३ ते ६ ऑक्टोबर २०२५ मध्ये राजपत्रात प्रसिद्ध होईल. ही प्रक्रिया पारदर्शक असून लोकसंख्येच्या आधारावर न्याय्य प्रकारे ठरवण्यात येत आहे, असे प्रशासनाने स्पष्ट केले आहे.
यापूर्वी अनुसूचित जमातींसाठी नगरपरिषदेतील कोणतीही जागा राखीव नव्हती, त्यामुळे या नव्या आरक्षणाचे महत्त्व अधिक आहे. महिला आणि मागास प्रवर्गांच्या प्रतिनिधीत्वासाठी हा निर्णय सामाजिक समावेशकतेची दिशा दर्शवणारा आहे.
कोणत्याही टिप्पण्‍या नाहीत:
टिप्पणी पोस्ट करा