आहिल्यानगर प्रतिनधी/२४ मे२०२५
अहिल्यानगर जिल्ह्यातील पोलिस दलामध्ये नवीन उत्साहाचे वातावरण निर्माण झाले आहे. शुक्रवारी, २३ मे २०२५ रोजी सकाळी नऊ वाजता नवीन जिल्हा पोलिस अधीक्षक सोमनाथ घार्गे यांनी आपल्या जबाबदारीची सुरुवात केली. रायगड जिल्ह्यातील पोलिस अधीक्षक पदावरून बदलून त्यांना अहिल्यानगरात पाठवण्यात आले आहे.
तसेच सोमनाथ घार्गे यांनी शुक्रवारी सकाळी साडेनऊ वाजता अहिल्यानगरात पाऊल ठेवले. शासकीय निवासस्थान असलेल्या वसंत कीर्ती येथे अपर पोलिस अधीक्षक प्रशांत खैरे आणि पोलिस निरीक्षक दिनेश आहेर यांनी त्यांचे औपचारिक स्वागत केले. पोलिस अधीक्षक कार्यालयात हजेरी लावल्यानंतर, घार्गे यांनी मुख्यालयातील विविध विभागांचे प्रमुख आणि कर्मचाऱ्यांची ओळख परेड घेतली. यावेळी आर्थिक गुन्हे शाखा, नियंत्रण कक्ष, स्थानिक गुन्हे शाखा आणि सायबर पोलिस ठाण्यातील कर्मचाऱ्यांनी पुष्पगुच्छ देऊन त्यांचे स्वागत केले. जिल्ह्याच्या विविध भागांतून आलेल्या पोलिस अधिकाऱ्यांनीही घार्गे यांची भेट घेण्यासाठी मोठी गर्दी केली.
राकेश ओला यांची बदली आणि निरोप समारंभ
राकेश ओला हे मावळते जिल्हा पोलिस अधीक्षक होते, ज्यांची बृहन्मुंबई येथे पोलिस उपआयुक्त पदावर बदली करण्यात आली आहे. गुरुवारी दुपारी गृह विभागाच्या सचिवांनी बदलीचा आदेश जारी केला होता. शुक्रवारी सकाळी शिर्डी येथील शासकीय कार्यक्रमाच्या बंदोबस्तानंतर ओला यांनी घार्गे यांच्याकडे पदभार सोपवला. ओला यांच्या कार्यकाळात जिल्ह्यातील कायदा व सुव्यवस्थेच्या बाबतीत महत्त्वाचे योगदान दिले गेले होते. त्यांच्या निरोपाच्या कार्यक्रमात पोलिस दलातील अधिकाऱ्यांनी त्यांच्या कार्याची प्रशंसा केली.
मुख्यालयातील स्वागत आणि आशावादी वातावरण
पोलिस मुख्यालयात सायंकाळी नवीन पोलिस अधीक्षक सोमनाथ घार्गे यांच्या स्वागतासाठी तसेच ओला यांच्या निरोपाच्या कार्यक्रमाचे आयोजन करण्यात आले होते. या कार्यक्रमात जिल्ह्यातील अनेक वरिष्ठ पोलिस अधिकारी आणि कर्मचारी उपस्थित होते. घार्गे यांनी यावेळी आपल्या नव्या जबाबदारीबद्दल उत्साह व्यक्त केला आणि जिल्ह्यात कायदा व सुव्यवस्था राखण्यासाठी सर्वांच्या सहकार्याची अपेक्षा व्यक्त केली.
कोणत्याही टिप्पण्‍या नाहीत:
टिप्पणी पोस्ट करा